FinfinneTribune.com is Gadaa.com

GOOTOTA OROMOO

Posted: Ebla/April 16, 2013 · Finfinne Tribune | Gadaa.com | Comments off

Tokkicha Abbaa Milkii irraa*

Gootota Oromoo kan nuuf jecha du,an
Bilisummaa keenyaaf wareegama baasan
Rukkutaa diinatiin ka qaamaa hir’atan
Yaadan cinqamanii kan sammuu jeeqaman
Kan manaa bahanii bosona jiraatan
Maatii facaasanii kan biyyaa baqatan
Kan mana hidhaatitti dararamaa jiran

Barreesseetoo hinfixuu
Seenaa keessa hin lixuu

Maqaasaanii hindha’u
Tarreessee hindanda’u

Hunduman faffaarsaa
Dachumaanan kaasaa
Bal’inaan akka ibsu seenessaaffan dhiisaa
Akka hindhiboofnef tuqeen honnachiisaa

Seennessonni Oromoo maal hojjachaa jirtuu?
Dhimma kana caalu maal faa barreessituu?
Seenaa gootota Oromoo ammanuma himtu?

Duqquqquu nurra ture ofirraa hin mulqinee?
Harras muusuu sodaa keessaa of hinbaafnee?

Maaluma sodaattuu?
Maalumaaf dhibooftuu?
Duuti silaa hin ooltuu.

Seenaa gootota Oromoo seenessaa barreessaa
Oto homaa hin dhoksin Addunyaadhaf ibsaa

Gaheen kuni keessani
Itti gaafatamtu dhiisuu hindandeessanii.

Wareegamtoota keenya kabajuun dirqama
Xinnaa guddaa hinqabu hundumtu qixxumaa

Soorressaafi hiyyeessa
Darggaggeessafii jaarsa

Dhiirafii Dubartii
Shamarraniifi jaartii

Hundaafuu qixxumaa
Lubbuun takkitumaa

Kan baatu hin deebine
Kan lamuu hin argamnee
Kan gatiin hin binnee

Ishii nuu laatanii
Ofii dhabamani
Maal ree gatiin saanii?

Meeqa haa baafnuree?
Waan qabnu waliguurree
Horii, farda, harree
Hoolaa, andaanqoo, re’e

Qarshii,warqee,meetii
Albuudaa mi’aawaa haa baafnuree gatii?

Danda’ee nuuf bitaa?
Lubbuu saanin gitaa?
Du’a saanii oolchaa?
Deebisee nuuf galchaa?

Sun hin danda’amtuu
Lubbuun takka baanan gatiin hin argamtu

Warra nu firrisan
Nuuf jecha dhabaman

Waan biraa hingoonufii
Kabajaa haa laannuufi

Kabajuun, yaadachuun, jaalachuun
Faajjii saanii kaafnee qabsoo galiin gahuun
Seenaa barreessinee hojii saanii ibsuun
Yaaddannoo hambisuuf siidaa saani ijaaruun
Faaruu baafanneetoo faarsatii adeemuun

Kaayyoo saanii eeguf
Qabsicha cimsuudhaf
Gootota kakaasuuf
Ummata gurmeessuuf
Saba honnachiisuuf
Alaabaa BILISUMMAA jalatti hiriirsuuf

Bu’aa guddaa qabaa
Waan abiraatii miti kanaafan lallabaa

Gadi fageessinee
Qormaata adeemsifnee
Seenaa qulqullaawaa sirriin galmeessine
Akka hin irraanfatamne diroo dhufaa darbaa haalan qaabachiifnee
Seenan akka hindaganne ciminaan barsiifnee
Ummata Addunyaa ifatti beeksifnee
Qabsoo isaan du’aniif haalan finiinsinee
Diina saba keenyaa biyyarraa buqqifnee
Biyyi walaboomee gaafa bilisoomnee

Gatii lubbuu saanii kan biraa maal baafnaa?
Yaaddannoo hin moofofne siidaa saanii dhaabnaa
Faaruu baafanneetoo faarsatii adeemnaa
Ekeraa saanirree kanaan gammachiifnaa.

* Tokkicha Abbaa Milkii: bariitee@ymail.com


Gadaa.com
Gadaa.com

Gadaa.com delivers information on Oromia and the Horn of African region: top news stories and analyses, politics, and culture, arts & entertainment, and more.

Gadaa.com